Keçid linkləri

-
Böyük yubileyə 10-ca gün qaldı, əziz oxucum!

Sükunət--susqunluq davam edir.

Düzdür, ötən həftə tədbirlər planı açıqlandı, amma… deyəsən, planı gerçəkləşdirməyə həvəs yoxdur…

Əvəzində bu gün Milli Məclis ««Heydər Əliyev» ordeninin təsis edilməsi haqqında» qanuna dəyişiklik təklif etdi.

Təəccübləndim, məncə, gündəmdə başqa ad olmalıdır, axı…

Diqqət edin:

««Heydər Əliyev» ordeninin döş nişanı - üzərinə ağ mina çəkilmiş dördguşəli ornament şəklində altılıqdan ibarətdir. Altılığın dörd guşəsinin hər birində yerləşən səkkizguşəli ulduz formalı elementin hər birinə 1 ədəd brilyant daş bərkidilir. Döş nişanının mərkəzində tünd qırmızı mina ilə örtülmüş lövhə, lövhənin mərkəzində Heydər Əliyevin barelyefi yerləşir. Barelyef çarpazlaşmış, kvadratşəkilli iki çərçivə ilə haşiyələnir. Hər çərçivəyə 56 ədəd brilyant bərkidilir.
Döş nişanı paltara bərkidilmək üçün elementi olan 23 mm x 9 mm ölçülü lövhəyə halqa və ilgək vasitəsilə bərkidilir. Lövhənin mərkəzində qabarıq hərflərlə yazılmış «HEYDƏR ƏLİYEV» sözlərindən yuxarıda və aşağıda - hər sırada 28 ədəd brilyant daş bərkidilir.

Döş nişanı 585 və 999 əyarlı qızıldan hazırlanır.

Bununla, ordenin hazırlanmasında 925 əyarlı 533.3 qram gümüşdən, 999 əyarlı 3.9 qram gümüşdən, 585 əyarlı 25 qram qızıldan, 750 əyarlı 57.4 qram qızıldan, 999 əyarlı 6.5 qram qızıldan, cəmi 0.83 karatlıq 8 brilyant daşdan, cəmi 5.3 224 brilyant daşdan, cəmi 1.37 karatlıq 95 brilyant daşdan, cəmi 0.23 karatlıq 116 brilyant daşdan, cəmi 0.032 karatlıq 4 brilyant daşdan istifadə olunur.

Ordendə ümumən 447 brilyant daşdan istifadə olunacaq».

Mən tarixi şəxsiyyətləri bir-birinə qarşı qoymaq fikrindən uzağam.
Bu işi Tarixin özü daha yaxşı bacarır və zaman keçdikcə hər şeyi öz yerinə qoyur…
Amma və lakin indi oturub-durub düşünürəm.

Görəsən, 130 illik yubileyində Rəsulzadə ordeninin döş nişanı necə ola bilərdi?!
Xəyal gücümü işə salıram.

Yəqin ki, orada qızıldan-gümüşdən-brilyantdan, minadan, yəni qiymətli daşlardan istifadə olunmazdı.

O döş nişanı elə taxıldığı yerin -- ürəyin şəklində olardı.

Oradan -- o ürəkdən Onun qurduğu Cümhuriyyətin obrazı görünərdi.

Cümhuriyyətimizin ovaxtkı sahəsi aydınca sezilərdi.

8-guşəli ulduz, aypara da öz yerində.

Ürək, zaman-zaman, musiqi çalardı -- gah Cümhuriyyətin himnini səsləndirər, gah da «Çırpınırdın, Qara dəniz» söyləyərdi.

Hərdən Rəsulzadənin yeganə səsyazısını da eşitdirərdi…

Əmin bəy şirin-yumşaq Bakı ləhcəsində:

«Sən bizimsən-bizimsən durduqca bədəndə can,
Yaşa-yaşa çox yaşa, ey şanlı Azərbaycan!» - deyərdi.

Ara-sıra, demokratiya dərsləri keçərdi.

Bəzən «İxtilal xatirələri»ni danışardı.

Bəzən də «Əsrimizin Səyavuşu»nun böyümüş oğlundan söz açardı:

«Ey gələcək nəsil, ey gənclik! Ey əsrimizin Səyavuşunun böyümüş oğlu!
Sənin üzərində böyük bir vəzifə var. Səndən əvvəlki nəsil yoxdan bir bayraq, Müqəddəs bir ideal rəmzi yaratdı. Onu min müşkülatla yüksəldərək dedi ki: Bir kərə yüksələn bayraq bir daha enməz!»

«Bir kərə yüksələn bayraq bir daha enməz!»

Döş nişanından zaman-zaman bu tarixi sözü dinləmənin özgə ləzzəti olardı…

Bir də, döş nişanında…

Yox, yetər!

Sözü sizlərə buraxıram.

Böyük demokratın döş nişanını diktatura qaydaları ilə cızmaq mənə yaraşmaz!

Ora sizlər də naxışlar vurun.

130 illik yubileyində «Rəsulzadə döş nişanı»nı siz necə görmək istərdiniz?!

Söz sizindir.

Böyük yubileyə cəmi 10-ca gün qalıb…

Tələsin.

Məqalədəki fikirlər müəllifin şəxsi mülahizələridir

Şərhləri göstər

XS
SM
MD
LG